THIL ENGE MAW TAK

                              ­

Hman deuh khan thawnthu Pakhat, “Thing kung Pathum thawnthu,” tih hi ka chhiar a. Chu thawnthu chu olive thing leh Oak thing leh Far thing chanchin a ni a. Olive thing chuan Mistiri them thiam takin rangkachak nen a belhbawm, a hun mawina leh a tak siamna hmanrua anih ngei ala ring a. Mahse nikhat chu thing kittu chuan rawnkitin ran chaw pekna thleng atan a tuk ta mai a, Olive chuan nep a inti a, a hlutna zawng zawng bo vekin a hria a, a beidawng ta em em mai a.

Chutiang bawkin Oak thing pawh chuan, Lal lawnglian ngul pawimawh taka chantir a la nih ngei a lo beisei a. Tuk khat chu thing kittu lo kalin ala rawn kit ta ngei a; mahse, a beisei loh ang takin, sangha manna lawng naran tak atana hman a ni ta zawk a.

Far thing pawh chuan thing dangte ang bawkin duhthusam a nei ve a. Ani chuan, hmun danga insawn lo va, tlangsang taka awma, Pathian thilsiam timawitu nih reng mai chu a duh a. Nimahsela, zan khat chu tekin vawilehkhatah a rawn deng chhum ta hmawk mai a, duhthusam leh tur pawh a awm ta lo.

Thing Pathum chuan an duhthusam chu an changpha lo. Beidawngin an hun an hmang a ni. Nimahsela, an tan Pathianin thil ruahman mak tak a lo neisa vek hi a lo ni. Kum tam tak a liam hnu chuan thilmak deuh mai a lo thleng a. Mari leh Josefa-te chu Khualbukah riahna chang lovin an vakvai a, chutahchuan ran in-ah thlentir niin,  ran chaw pekna thlengah chuan nausen Isua chu a piang ta. Chu ran chawpekna thleng chu Olive thing beidawng em em mai kha a ni. Olive thing khan Khawvel thil ropui leh rangkachak nena dah nih a duh hle laiin, Pathian chuan chu aia hlu zawk a fapa pian nan a rawn hmang ta a ni. Pathian fapa pianna nih chu a tan chuan a aia hlu reng a awm lo.

Nausen Isua chu a lo seilian deuh deuh va. Ni khat chu dil lehlama kal turin lawng a mamawh a; tichuan, anichuan sangha man lawng tereuhte chu a thlang ta ni. Chu lawng chu kan han tarlan tak Oak thinga siam kha a ni. Lal lawng nih duh oak thing chuan tunahchuan lalte Lal chu a phur ta a ni. A din hmun tur chu I hrethiam nghal mai ang chu.

Tichuan, kum tlemte alo liam leh hnu chuan Rom sipaite chuan Far thing tekin a a den tliah chu, rawn hmu-in an la ta a. Far thing chuan thingtuah atan an la niah ngaiin a lungngaiin a beidawng hle mai a. Nimahsela an tan bung a, kross atan an hmang ta a ni. Chu chu Lal Isua an khenbehna kross chu a ni. Chu thing chu vawiin thleng hian mite ngaihhlut leh ngaihven ber a lo ni ta.

He thawnthu hi a tak anih leh nihloh chu dah tha ta ila. Khang thing Pathumte khan an duhthusam leh beisei chu an hloh vek tawh a, an dinhmun chu phehin an beisei loh ang an chungah a thlengvek a ni, Mahse Pathian fakna hla siamtu chuan “Ka chhiatna tur reng a ngaihtuah ngai lo ve” a ti ang khan, I dinhmun chu lo chhia-in Mihring ngaihtuahna dan atang chuan beiseitur awm tawh lo mahse Rom 4:18 “Beiseina awm a awm loh pawhin ani chuan beisei takin a ring a,”tih Abrahama chung chang kan hmuh ang hian, Lalpa chu ring la Beisei rawh, I nunah dah hmasaber la; I tan hian engemaw tak a ruat  a ni.